Michael and Mias on the road: Nordinsel

So, nach laengerer Absenz wider mal aes Laebensziichae vo ues. Mittlerwilae si mier numae nu ds zweit underwaegs, Bruno u Domi si ds Tasmaniae u scho gli ds Ouschtraliae.

Mier fluegae huet witer uf Los Angeles, somit isch Neuseeland scho gli Gschicht. D Nordinsel het nid di glichi Dichti a schoenae Plaetzeni, aber o da hets paar fantastaeschi regionae.

Vo Abel Tasman simer via Nelson uf Picton, dert mit dr Fahrae uf Wellington (Nordinsel) u naer sofort Richtig Nordae. Dert umae hetnes ae Maori d Gheimniss vo ihrer Ernaehrig verzellt. Mier si diraekt witer uf Taupo, ae Stadt mitemae glichnamigae See. Naer simer ds Rotorua glandet, dert umae hets groesseri vulkaneschi Aktivitaetae, vor allem Geysirae u brodelndi Schlammgluntae. Zum Glueck himer das herrlaechae Baechli entdeckt, wo sowohl hiiss- als o Chaltwasser het gfuehrt. Das isch entspannig puur gsi. Di witerae Stationae si Waitomo u Hamilton gsi, dert himer Kollegae bsuecht. Nach laengerem umaereisae himer wider mal wellae am glichae Ort blibae, ir Region vo Coromandel himer ds huebschae Doerfli Hahei gfundae, dert simer gad acht Naecht blibae. Isch fasch chli wi Badeferiae gsi, ds Meer nu gad gaebig warm. Da Domi u Bruenl ds Auckland dr Abflug nid hi wellae verpassae simer schliessaech ufbrochae u hines verabschidet, aes isch ae Superzit gsi.

Mier si du ohni Outo underwaegs gsi u hinae Bustour buechet, diae hetnes ganz i Nordae bracht. Mier hi jedae Tag choennae entscheidae obmer witer wii oder nu am glichae Ort blibae, das isch aes gaebigs Aagebot. So simer 3 Naecht ds Paihia bimenae schregae Chiib uebernachtet u hi dert ae Usflug zum Cape Reinga gmacht. Dr Maori-Buschauffeur isch ae koeschtligae Chiib gsi u hetnes uh viil Gschichtae, Legendae, Witzae u Anektotae verzellt. Sandboardae het o nu toll gflashet, vor allem will dr Chauffeur dr Obersandboarder isch gsi unes dr groebscht Hang het achiglah. Di letschtae Taeg simer schliesslig nu ds Whangarei gsi, dert himer per Zuaefall Jan us Frutigae troffae. Dae hetnes nu zu sinae Bekanntae iigladae, das isch ae gmuetligae Abae gsi wordae. Uesi Underkunft isch wunderbar gsi, aes familiaers Backpackers womer mit paar andernae wi imenae Huushalt hi gwohnt u scho nach paar Stund wi alti Kollegae si gsi. Unkomplizierti Supertypae himer lehrae kennae.

Jetz simer ds Auckland u fluegae scho gli los, mal luegae was ir naechschte Zit so alles passiert. Bis gli.