Michael and Mias on the road

Mittwoch, 7. September 2011

From British Colombia to Juneau, Alaska

Aes isch wider viil Zit vergangae sitem letschtae Iitrag u ds Endi vo ueser Reis stiiht churz bevor. Nach dae Bowron Lakes si mier stetig Richtig Nordae gfahrae, mitem Ziel Alaska ds errichae. D Staedtleni ud Doerfleni si immer wie chliner wordae. D Strass isch mischtens schnuergrad gsi, ohni viil Verchehr u het duer di puuri Wildnis gfuehrt. Entlang vom Highway hets immer wider sogenannti Recreation Sites gha. Das si Plaetzeni amenae See oder Fluss, mischtens im Wald, usgrueschtet mitemae Plumpsklo, Fuerstell u meh oder weniger flachem Untergrund zum ds Zaelt ufstellae. Da ues ds Gaeld langsam aber sicher isch usgangae hets nued gschadet das sonae Uebernachtig gratis isch gsi. Ds Smithers uds Whitehorse himer ues jewils fuer 2 Naecht imenae Motel iignischtet unes putzt u gstrehlt. Churz nach Whitehorse simer schliesslig wider uf amerikanischae Bodae gfahrae u hi fuer paar Tag ds Haines zaeltlet. Der hetnes ae Native (frueher under Indianer bekannt) ae Fluss zigt wo massaehaft Lachsae laichae. Wos Lachsae het si d Baerae miischtens nid wiit waeg u mier hi di interessantae Tier lang vo nachem choennae beobachtae. Schliesslig simer miter Faehrae Richtig Juneau ufbrochae, mitem Ziel dert ueses Outo ds verchuufae. Das isch i dae letschtae 2 Wuchae du schliesslig uesi Hupttaetigkiit gsi. Nacherae Zit vo leerae Versprachae u ueberraschendae Wendigae himer uesae treu Dodge geschter arae Jungae Frou verchuuft. Dank Lynn, das isch ae Fruend vo Mich sinae Verwandtae, himer ds Juneau o nu chli d Natur choennae gniessae u si 2 mal mitem Kajak ufs Meer. Das hetmae muessae gniessae, will 12 vo 14 Tag hets hiae meh oder weniger nonstopp graegnet. Jetz himer wider chli Bargaeld womer hoffentlig naechst Wuchae ds Las Vegas nid dumm verspilae. U de simer scho wider daehim, zrug ir schoenae Schwiz.

Montag, 1. August 2011

Bowron Lakes Canoe-Trip

Nachdaem mier ueses Kanu hi abgholt, simer a obligatorisch Infovortrag wo d Rangerin uf moeglechi Gfahrae het hiigwisae. Mier hi ae Chartae uebercho u am Afang gad ae Portage muessae bewaeltigae. D Portage isch ae Strecki womae ds Kanu uf Redleni uebernae Naturwaeg stoost, immer so diraekt wi mueglaech zum naechschtae See oder Fluss. Insgesammt si oeppae 12 km vo dae total 130 km us Portage bestandae u hi dr astrengenscht Tiil vom Trip dargstellt. Top motiviert himer ueses Gepaeck duer Portage, See, wider Portage u nomal See gmanoevriert u si mueed bim erschtae Campingplatzi acho.
Ds schoenae Buechtli am Indian Point Lake hetnes sofort zum fischae iigladae u mier hi nid lang ufae erscht Fisch muessae wartae. Beidi vo ues hi aes Znacht gfangae u das himer so gli als meuglaech wellae aessae.
Leider isch ae groeberae Rueckschlag cho.., mier hi tatsaechlech uesi Pfannae im Outo vergaessaeu hi am naechschtae Tag di ganzi Distanz nu zwue mal muessae zruglegae. D Fischae himer a daem legendaerae Abae zum Glueck ufem Fuerli choennae zuebereitae, das isch uh fein gsi u mier hi das naer fasch jedae Tag so gmacht.

Ir Hoffnig, dass mier us daerae Dummhiit hi glehrt simer Tag vo Tag witerpaddlet, u tatsaechlaech, mier si vo
aehnlechem Versaegae verschont blibae. Zum taeglechae Fisch hets mittlerwilae ja o Pasta gae u das himer guet
choennae bruchae, paddlae isch vinaechli aastrengend. Aber i sorae fantastischae Kulissae wi bi dae Bowron Lakes fallts iim nid schwer ds regenerierae. Mengisch himer am Abae amenae Fuerli anderi Kanutae lehrae kennae, ganz flotti Luet si das gsi. Zum Tiil hisi ds Gfuehl gha mier sigae chli armi Chiibae willmer immer hi gfischet u Pasta gaessae. Drum hisines ds Aessae mitgaeh, aber ues isches ja gar nid schlaecht gangae, Pasta u Fisch isch imel guet!?

Ar iintae Stell nachem Isaac Lake muessae mae de ganz guet ufpassae hetmae ues gsit. Dr Fluss git dert ueber stiinigs Glaend u het vinaechli Schuss, gfolgt vorae scharfae Raechtskurvae. Womer dert si gsi hets gar nid so grob usgseh u anderi Kanu si meh oder weniger locker derduergfahrae, so o mier. Am naechschtae Abae himer aber ae Familiae lehrae kennae wo isch gschiteret u ds Kanu kenteret isch, nid gaebig. Anderi Naturgfahrae choentae Baerae si, himer aber kiner gseh. Moose (Elch) si o bekannt dass si vinaechli choennae grob tuae, settig himer du o gseh aber di hi lieber Pflanzi gfraessae als ues. Schlussendlig si wider mal d Muggae di inzigae Tier gsi wo hi gstoert, aber da simer jetz afae toll abghertet u mier hines diae einmaligi Erfahrig nid vo paar Insektae la kapputnae. Nach 10 Naecht ir Wildniss simer fit u mit villnae Erlaebnis id Zivilisation zruggkehrt u hines ufnae Duschi gfreut.

di letschte Vorbereitigae

Portage...

endlech bim Wasser

dr erscht Fisch

Bucht im Indianpoint Lake

ufm Isaac Lake

65cm Lake Trout

Abe am Isaac Lake

ueses camp fuer zwue Naecht

schwirigi Passage

Cariboo River

Rainbow Trout

Fisch isch drann...

Moose

gnuetlechi Huette fuer di letschti Nacht

Moose mit Kalb

Blick zrugg

Sonntag, 31. Juli 2011

from Yellowstone via Vancouver to Regina

D Fahrt vom Yellowstone Richtig Vancouver himer i mehreri Etappae uftiilt. Mier si am speterae Mittag losgfahrae u hi am Abae irgendwo wosnes gad het gluschtet ae Zaeltplatz gsuecht.
Ir Nechi vo Seattle simer inisch inae Vergnuegispark, dert hets Wasserbahne gha u o anderi wos iim nu schier isch schlaecht wordae.
D Kanadier hi ues am Zoll flotterwiis ids Land inaeglah u scho simer ds Vancouver gsi. Dert himer chli usserhalb vor Stadt ir nechi vo Squomish ae schoenae Camping gfundae. Ds erschtae mal nach 2 wuchae himer wider 2 Naecht am glichae Ort verbracht, das isch wider iis gaebig gsi.
Paar flotti, aehnlach alti Kanadier hi dert ires Weekend verbracht umier hi zaemae am Fuerli ae flottae Abae gha.
Als naechschts simer mit dr Faehrae ufd Vancouver Island gfahrae, dert het d Natur fasch gli usgseh wi ds Neuseeland. Aes isch alwae raecht fuecht i derae Region, mier hi aber Glueck gha u aes het nid graegnet.
Aes Highlight vo derae Insel isch ae alti Baeckerei gsi, dert hesch usnahmswiis Schwiz-wuerdigs Brot u schuesch Gebaeck uebercho. Di letschtae 3 Tag bevor d Lydia wider hiim isch gflogae simer ds Vancouver ir Stadt gsi. Das isch ae richtig schoeni Stadt, het aber o aes Viertel womer definitif niae wettae wohnae.

Mittlerwilae si Mich u Mias wider allini witerzogae u hi vo Vancouver us d Rocky Mountains durchquert. Mier hi bis uf Calgary wider paar mal uebernachtet, d Landschaft isch fantastisch gsi. Vor allem ir Region vo Lake Louise wosi o Skirennae faehra heti mier gaern wild campet u gfischet, da das Gebiet imenae Park ligt isches aber ned mueglech gsi. Vlich besser so, will so viil "Moskitos" wi dert himer nu niae gseh, das isch nued gfreuts.
Schlussendlig himer ues du entschidae dasmer Calgary umfahrae u diraekt Regina aavisierae. Ds Regina wohnt ae Familie wo sit Jahrae mit Mich befruendet isch ud Stadt ligt mitts im Niemandsland vo Kanada, Praerie pur. Nachemae 12-Stundae Ritt duer Alberta u Saskatchewan simer schliesslig bi dae Hewards acho u hines iigrichtet fuernes Zitli dert ds blibae.
Mier si du 10 Tag dert gsi u hines d Zit mit Football waerfae, Basketballnae, suessem Nichtstun oder uf dr Driving Range mit Golfe vertribae.
Inisch simer nu anae Football Match zwueschae dae Sakatchewan Roughriders u dae Montreal Alouettes. Trotz dr Understuetzig vo 30'000 Zueschouer hid Lokalheldae leider strub verlorae. D Hewards hi uf jedae Fall guet zu ues gluegt u mier freuae ues scho we de irae Sohn, William, zu ues id Schwiz chunt.

Nach 10 Naecht imenae Bett isches wider Zit gsi fuernae Trip, dismal himer so schnaell wi mueglaech nach British Colombia zu dae Bowron Lakes wellae. Dert gits ae Kanutrip womae im Kreis duer diversi Gewaesser paddlet u schliesslig wider am Usgangsort aachunt. Mier hi waerend dr Aareis d Park- u Kanumieti organisiert u di 1500 km i anderthalb Tag hinder ues glit.
Nid mal di golfballgrossae Hagelchoerner wones d Frontschibae hi gspaltae hines choennae ufhaltae. Mit gnue Nahrig ide Ruckseck simer also da gsi u hines ines neus Abentuer gstuerzt.