Routeburn-Track u Milford Sound

 Nachem Supertripp mit Dänl himer üs irä „Cabin“ wider iigrichtet unes ufä Routeburn-Track vorbereitet. Das isch ä 3-Tägegi Wanderig i dä Bärgä zwüschä Queenstown u Mildford Sound. Mier si mitem Outo zum Istiig gfahrä u hines mit müglächscht wenig Gepäck ufä Wäg gmacht. Ds Outo hettnäs ä attraktivi Asiatin zum Divide gstellt, das isch dr Zielpunkt vo däm 35 km lengä Naturerläbiniss.

Am erschtä Tag hets ä chli meh grägnet als prognostiziert, u will mier nid ufemä offiziellä Plätzi hi wellä übernachtä, ischs vinächli garschtig gsi das Zält am abglägenschtä Ort vor Wält ufdstellä. Aber zviert imenä Zält hetmä gwüss vinächli warm.

Am nächschtä Tag himer Teil 2 i Agriff gno. Mier si grückt winä morä u am Nami am Lake Mac Kenzie acho. Dert hetsnes so fescht gfallä dasmer üs hi entschidä, hiä z übernachtä. Drum himer gad ds Zält ufgstellt u si när glich nu bim Hut Warden üsi Presenz ga mäldä. Är isch am Afang nid schier begeischtert gsi, wider mal hi vier Häblä nid im Vorus buechet. Obwohl dr Camping usbuechet isch gsi heter üs nid usägworfä. Äs het älwä gnützt dasmer vor Härkunft usemä chlinä, chlinä Dörfli i dä Bärgä hi verzellt.

Tag 3 isch inisch meh ä herrlächi Wanderig gsi. Bärgä, Wald u Gewässer si zurä perfektä Symbiosä verschmolzä. So simer zfridä u nid mal so erschöpft bim Divide acho, dert hetnes ds Outo mit dä chüelä Bier erwartet.

Ds Fiordland u Milford isch nid wit wäg vom Divide, drum simer scho gli wider losgfahrä. Bim Mildford Sound himer üses Zält ufgstellt, im Pub ga ässä u när zfridä ipennet. Am Morgä himer ufemä Bööti zMorgä gässä unes när Richtig Queenstown gmacht. Iinisch meh himer i üserä Cabin d Batteriä ufgladä u si jetz chli am witerplanä.

Bis gli

Di letschtä Vorbereitige vorem Start

Underwägs

üsi Unterkunft für d Nacht

Pancakes am Morgä, das stellt uf

Blick i Wald

Ufem Schiff im Milford Sound

Ufem Wäg zrugg nach Queenstown

around Queenstown

Mier hi dr Lake Tekapo verlaa u hines richtig Queenstown ufgmacht. Dert acho, himer afe is z Nachtläbä vo dem Stedtli gnosse... Mier hi nes mit Dänl troffe u abgmacht für ne Kanutrip ufene Inslä im Lake Wakatipu womer de o hi übernachtet. dä Trip himer sehr gnosse es isch fantastisch gsi...

so fertig gschribe,  müesse no es paar Vorbereitige fürne 3 tägegi Wanderig düre Routeburn-Track.

PS vo Mich: Gratulation dä Tornados zu däm Supersieg, witer so Männdeni

Hie no es paar Bilder:

Gruppäbild churz nachem Lake Takapo

Ussicht über Queenstown

D Vorfrüüd stigt

Parat für i See

üses Hiimetli fürnä Nacht

Fantastischä Usblick vor Insel us

Dänl ir Morgädämmerig

zwe "Kajakä"

nu iis zwe Kajakä

ifach numä herrläch

Begeisterig puur

Sicht Richtig Bärgä, wo o Herr der Ringe isch dreeit wordä

Ankunft, Outoübernahm, Pannä u Camping

Ankunft, Outoübernahm Pannä u Camping

Sowohl Brünl u Domi, als o Mias u Mich hi dr Fluug inigermassä überstandä. Gschlafä himer während dessä härzläch wenig. 2 mal ä 11 Stundfluug isch nid gad Erholig puur. Gröberi Zwüschäfäll si usblibä, leider isch aber üses Zält ds Christchurch nid ufem Baggage Claim gsi. Gar not good. Drfür himer üs dert schliessläch all troffä u si dr reserviert Charä ga übernäh.

Imena Warehouse himer üs mitema neuä Zält usgrüschtet, Täller u Bsteck gchuft u si när ufd Suechi nachemä Camping. Rakaia Huts we ä gueti Wahl gsi, himer denkt. Leider isch d Existenz vo däm Plätzi älwä ledigläch ä Mythos. Mier his imel nid gfundä u si bim Idunklä ds Rakaia sälber ufenä Zältplatz.

Ds vollä, altä Männdi mitem „Bushy Beard“ umenä luschtigä Huet isch ä flottä Chiib gsi u het äxtra amenä Restaurant aglütä, so dasmer imel nu öppis z haberä hi übercho. Nachem Ässä himer ds Zält ufgstellt u endläch äs Götterdüschi gnossä. Am Morgä bini zu mirä Überraschig scho am 6i erwachet u scho gli hani Brünl u Mizl ghörä lachä, mier hi gwüss scho am erschtä Morgä ä vollplatä Reifä bestuhnt. 

 

Dank Ross‘ (ds vollä, altä Männdi) sirä Hilf u sim Hammer himer dr Radwächsel trotz psychomässig azognä Schrubi hinder üs bracht. Bim Rakaia River simer nu chli ga luufä u hi äs Bachbett gseh, so grob wi das vor Chienä im 2005 ;-)

Mier hi witer wellä u si los Richtig Lake Takapo, dert himer di spezielli Landschaft vo Neuseeland dörfä betrachtä. Nacherä churzwiligä Fahrt simer also a däm Takapölti acho u hines briit gmacht. Dr Abä isch mitemä BBQ abgrundet wordä. 

 

I dä nächschte Täg wärdä miernes när ufä Wäg nach Queenstown machä. Dert träffä mr Dänel, ä guetä Kolleg vo Mizl sinm Vater. Alles i allem si di erschtä Täg Neuseeland super gsi, o wes ds intä oder anderä Problem het z mischterä gä. Bis gli

Bis gli

Hey, merci für alli guetä Wünsch u di luschtigä Abschiidsaabä. Morn gits ab uf Neuseeland, für Mias u Mich via Hongkong, für Brünl u Domi via Los Angeles.

We alles klappt simer üs am Mittwuch Abä ufemä Camping vo dä Reisestrapazä am erholä. Unes Bier cha denn de sicher o nid schadä.

@ Canadian and American Friends, see you soon and fasten your seatbelts, we will check your country ;-)