Michael and Mias on the road: Mai 2011

Ds San Francisco himer paar gueti Taeg verbracht u ueser Schwizer Kolleginae choennae traeffae.
Wi gsiit himer naer zrug ids Yosemite Valley wellae. Dert isch alles usbuechet gsi u drum himer ues chli usserhalb vom Park imenae Oertli namens Oakhurst niderglah. Dert himer ues ae Goldwaeschusrueschtig gchuuft u e Schleusae saelber baschtlet. Mier hi wider iis nid schier viil Gold gfundae, aber drfuer het ds Aessae am Abae umso besser gschmeckt. A dem Abae si mer vom brasilianischae Nachbar (Nino) kulinarisch verwoehnt wordae u dr chli elter Amerikaner (Dennis) isch uesae "Woodman" gsi u hetnes mit Holz im Ueberfluss versorgt. Mier si ae Gruppae vo ganz verschidenae Chiibae gsi, hines aber herrlig verstandae.
Nach 5 Naecht ds Oakhurst simer du glichwohl witer gfahrae. Amenae warmae Morgae himer dr Campingplatz verlah u si am speterae Nachmittag ds South Lake Tahoe im Schnee usem Outo usgstigae. Aber das simernes ja scho gwanet gsi u hetnes nid schier gstoert.
3 Tag speter hetsnes ueses Zaelti nu inisch iigschniit, zum Glueck himer aes grosses Fuerli gha womer ues vorem pennae hi choenae waermae. Mit Goldwaeschae u Wanderae isch bi settnigae Verhaeltniss halt nued gsi u mier hines drum o mal mitemae Film im Chino oder arae usgibigae Rundi Blackjack inme Casino d Zit vertribae.
Jetz simer ufem Waeg Richtig Salt Lake City womer James goe ga bsuechae, da gits de sicher wider oeppis ds verzellae.

San Francisco

d Golden Gate Bridge im Nebel

San Francisco

Ufm Weg richtig Yosemetie/Oakhurst

Ueses Plaetzi z Oakhurst

Mich ohni Gold

Uesi Goldwaesch-Usrueschtig

Uese Claim

Di selbergmachti Schleuse i Aktion

Nino, Mias u Dennis

Super Verhaeltnis ufm Weg nach Lake Tahoe

ufm Fallen Leafs-Camping

Es fet um afa schniie

Mich waermt sech am Fuerli uf

Zelt am Morge

Blick uebere Fallen Leafs Lake

Aes isch wider aes Zitli haer sitem letschtae Iitrag. D Amis hi leider gar kiner Internet Cafes.
Wireless het alles chli genderet, drum schribemer jetz o uf Mizl sim brandneuae Netbook. Aes isch nid
mueglaech alles ds erwaehnae wo i dae letschtae 3 Wuchae isch passiert. Womer ds LA si acho himer uf
jedae fall toll ae Kulturschock erlittae. Ae uh grossi Stadt fuer paar Kiener Chiibae.
Ds Santa Monica himer ae Unterkunft gfundae unes uf d Suechi nachemae Outo gmacht. Dr Kontaktmaa Morris u dr Verchuefer Raffi hines ae 99er Dodge Durango empfohlae, ganz aes schuechs Chaeri ;-) Ir Schwiz waerdae mier definitif nie meh sones Outo fahrae, das we Verhaeltniswahnsinn. Uf jedae fall himer d Chuuf, d Registrierig ud Versicherig rasch abgwicklet u d Finanzierig himer schliesslaech o sicher gstellt.
Mitem uesem neuae Outo himer ueses Backpacker ds Santa Monica verlah u si uf uesae Tripp ufbrochae. Zersch simer uf Pismo Beach ga zaeltlae, dert himer zwo Schwizerinnae lehrae kennae u wider iis Schwitzerduetsch brichtet.
Als naechschts simer witer Richtig Morro Bay, mittlerwilae mit GPS, Chocher, Chuehlbox usw. usgrueschtet. Dert isch uesi Campingside 123 vinaechli guet bsuecht wordae, zum Tiil si 15 Amis bi ues am Fuerli ghocket
u hi ueser Gschichtleni oder Mizl si Floetaekunscht wellae losae.
Am naechschtae Tag hani glaesae das d San Jose Sharks aes Western Conference Halbfinal Spiil gaeg d Detroit Red Wings ustragae. Waer Hockey chli kennt wiis dases vinaechli ae gueti Paarig isch gsi. Mier hi ufem Schwarzmarkt trotz usverchufter Huetae, Billets fuer gueti Plaetz uebercho u uf jedae Fall aes spannends Spil gseh.
Am naeschtae Tag simer los Richtig Yosemite Natinalpark, das isch ae Knueller wordae. Scho d Fahrt dert haerae isch ae grossae Waechsel gsi, vom Meer u dr Sunnae ids Gebirge u i Schnee. Ufem Pass Richtig Yosemite valley hets imel nu chli Neuschnee gha u ir erschtae Nacht isches toll chalt gsi, het imel gfrohrae. Mier si ufem legendaerae Camp 4 glandet, dert si zum groeschtae Tiil igfraessni Chlaetterer, underem anderem o d Beth Rodden, schins di aktuell beschti Chlaetterin ueberhubts.
Vo all daenae Chlaetterer hi mier ufem Platz 30 di vlich krasseschtae jungs vo allnae troffae. John, Matt, Joel u Kevin, saelbschternennti "Dirtbags", was nuet schlaechts soell hissae, sondern irae iiget Livestyle beschribt. Mier hines mit daenae Jungs imel sofort super verstandae u hi saelber chli afa boulderae u chlaetterae, besserei Lehrer unae schoeneri Gaegend himernes ja fasch nid choenae vorstellae. Ufem Camp 4 doerfae pro Summersaison numae 7 Tag uebernachtae, mier hi di Taeg guet usgnuetzt u si ga wanderae oder hi gslacklined oder Hacky gspilt. D Yosemite Falls, dr Half Dome oder natuerlaech dr El Captain, ds ernenntae Ziel vo uesnae Kollegae, si fesselendi Kulissae gsi.
Leider si di Taeg uhimlig schnaell verbi gangae, mier si jetz scho ds San Francisco u traeffae nu mal ueser schwizer Kolleginae. Das isch guet oepper ds kennae wemae vor Natur wider inae grossi Stadt zrug fehrt. Ds Ziel vo uesem naechschtae Tripp isch imel scho feschtgliiht, Yosemite Valley...